សហគមន៍​នេសាទ​ចុង​ឃ្នៀស ជាស​ហគម​ន៍ដែល​ស្ថិតនៅ​តំបន់​បឹងទន្លេសាប​ ដែល​ត្រូវ​បាន​ទទួលស្គាល់​ថា​ជា​ឋបនីយ​ជី​វមណ្ឌល​ និង​ជា​ប្រព័ន្ធ​អេកូឡូស៊ីទឹកសាប​ដ៏​ធំបំផុត​នៅ​អាស៊ី​អាគ្នេយ៍​។ សហគមន៍​មានតួនាទី​យ៉ាងសំខាន់​ក្នុង​ការ​គ្រប់គ្រង​ និង​អភិរក្ស​ធនធាន​ជលផល​ ព្រៃ​លិចទឹក​ និង​ជី​វចម្រុះ​ ព្រមទាំង​ជាគោល​ដៅ​ទេសចរណ៍​ធម្មជាតិ​ដ៏​ល្បីល្បាញ​ ដែល​ទាក់ទាញ​ភ្ញៀវ​ទេសចរ​ជាតិ​ និង​អន្តរជាតិ​ឱ្យ​មក​ទស្សនា​ជីវភាពរស់នៅ​លើទឹក​ និង​ប្រពៃណី​នេសាទ​របស់​ប្រជាពលរដ្ឋ​។ សហគមន៍​នេសាទ​ចុង​ឃ្នៀសមាន​ផ្ទៃដី​ ទំហំ​ ៧,៣៣៨ហិកតា​ ដែល​លាតសន្ធឹង​ជាប់នឹង​សហគមន៍​នេសាទ​កណ្ដែក​ នៅ​ភាគ​ខាងកើត​ ខាងលិច​ទល់នឹង​សហគមន៍​នេសាទ​កែវ​ព៌ណ ខាងជើង​ទល់នឹង​សង្កាត់​សៀមរាប​ និង​ខាងត្បូង​ទល់នឹង​លំហ​របឹង​ទន្លេសាប​។ សហគមន៍​នេសាទ​បាន​សម្រេច​បង្កើត​ តំបន់​អភិរក្ស​ចំនួន​ពីរ​កន្លែង​ ដែល​មានសក្តា​នុ​ពល​សម្រាប់​ការ​អភិរក្ស​ត្រី​មេ​ពូជ​ និង​ជី​វចម្រុះ​ គឺ​បឹង​ពារាំង​ ដែល​មានផ្ទៃ​អភិរក្ស​ទំហំ​ ៤៨ហិកតា​ និង​បឹង​ដៃ​តា​ណូន​ ដែល​មានផ្ទៃ​ទំហំ​៣ហិកតា​។

ដោយមាន​ការ​គាំទ្រ​ពី​អង្គការ​អ្នក​ត្រួសត្រាយ​នៃ​កម្ពុជា​ សហគមន៍​នេសាទ​ចុង​ឃ្នៀស បាន​ទទួល​មូលនិធិ​ពី​ កម្ម​ វិធី​ជំនួយ​ខ្នាត​តូច​នៃ​មូលនិធិ​បរិស្ថាន​សាកល​ នៃ​កម្មវិធី​សហប្រជាជាតិ​ (SGP GEF UNDP) ក្នុង​ការ​អនុវត្ត​គម្រោង​ “ពង្រឹង​ការ​អភិរក្ស​ជី​វចម្រុះ​ និង​លើក​កម្ពស់​ជីវភាព​សហគមន៍​នេសាទ​ចុង​ឃ្នៀស តាមរយៈ​ស្ថានីយ​ផលិត​ទឹក​ពិសា​របរិសុទ្ធ​ និង​ការ​គ្រប់គ្រង​ធនធាន​ជលផល​ប្រកបដោយ​និរន្តរភាព​” លេខ​គម្រោង​KHM/COMDEK-4/2025/07 ។ គម្រោង​មាន​គោលបំណង​ពង្រឹង​កិច្ចការពារ​ និង​អភិរក្ស​ដែន​នេសាទ​ចុង​ឃ្នៀស ជាពិសេស​តំបន់​អភិរក្ស​បឹង​ពារាំង​ (ត្រី​ សត្វស្លាប​ និង​ព្រៃ​លិចទឹក​) អោយ​មានប្រសិទ្ធិភាព​ និង​ ផ្តល់ប្រភព​ចំណូល​ចំបង​មួយ​ដល់​គណកម្មការ​សហគមន៍​នេសាទ​ចុង​ឃ្នៀស សម្រាប់​អភិរក្ស​ និង​អភិវឌ្ឍ​សហគមន៍​ប្រកបដោយ​និរន្តរភាព​ តាមរយៈ​បង្កើត​ស្ថានីយ៍ផលិត​ទឹក​ពិសា​របរិសុទ្ធ​មួយ​ដែល​មាន​សមត្ថភាព​ផលិត​ទឹក​ពិសា​របរិសុទ្ធ​ចំណុះ​៣០០០លីត្រ​ក្នុង​មួយម៉ោង​ ដើម្បី​ផ្គត់ផ្គង់​តម្រូវ​ការ​ទឹក​ស្អាត​ប្រើប្រាស់​នៅ​ក្នុង​សហគមន៍​ ។

ដើម្បី​សម្រេច​បាន​នូវ​គោលបំណង​នេះ​ យើង​ត្រូវការ​ក្រុមហ៊ុន​ម៉ៅការ​ដែល​បាន​ចុះបញ្ជី​ និង​មាន​បទពិសោធន៍​ ក្នុង​ការ​សាងសង់​អគារ​ស្ថានីយ៍ចំនួន​១ខ្នង​ ប្រក់​សង្ក័សី​ ដែល​មាន​បណ្ដោយ​ ១២ម៉ែត្រ​ ទទឹង​៦ម៉ែត្រ​ និង​កំពស់​៦.២៧ម៉ែត្រ​ ក្រាល​សាប​បាត​។