អង្គការ​ជីវិត​ធម្មជាតិ​នៅ​កម្ពុជា​បាន​នឹង​កំពុង​អនុ​វត្ដគម្រោង​ “ពង្រីក​វិសាលភាព​ត្រី​ទន្លេ​ដែលជា​ផលិតផល​អភិរក្ស​ជី​វចម្រុះ​ ដើម្បី​លើក​កម្ពស់​ការចូលរួម​គ្រប់គ្រង​បឹងទន្លេសាប​” ក្រោម​ថវិកា​គាំទ្រ​ពី​មូលនិធិ​ជំនួយ​ខ្នាត​តូច​នៃ​មូលនិធិ​បរិស្ថាន​ពិភពលោក​ (SGP GEF UNDP) ដែល​មាន​គោលដៅ​ពង្រឹង​នូវ​ជម្រើស​មុខរបរ​ប្រកបដោយ​និរន្ដរ​ភាព​មួយ​សម្រាប់​បង្កើន​ ឪកាស​ការងារ​ដល់​សហគមន៍​រស់នៅ​ក្នុង​និង​ជុំវិញ​បឹងទន្លេសាប​ ហើយ​អាច​ចូលរួម​គ្រប់គ្រង​អភិរក្ស​បឹងទន្លេសាប​ ប្រកបដោយ​សមធម៌​ និង​និរន្ដរ​ភាព​ ដែល​មាន​កិច្ច​សហការ​ល្អ​ក្នុង​ខ្សែ​សង្វាក់​ផលិតកម្ម​និង​ទី​ផ្សារ​សម្រាប់​បង្កើន​ប្រាក់ចំណូល​ប្រចាំថ្ងៃ​ និង​លើក​កម្ពស់​ភាពជា​អ្នកដឹកនាំ​ស្រ្ដី​ក្នុង​សហគមន៍​។ គម្រោង​នេះ​មាន​រយៈពេល​ ៩ខែ​ គិត​ចាប់ពី​ថ្ងៃ​ទី​១៥ តុលា​ ឆ្នាំ​២០២៥ រហូតដល់​ថ្ងៃ​ទី​៣០ ខែ​មិថុនា​ ឆ្នាំ​២០២៦ ដែល​នឹង​អនុ​វត្ដទៅ​នៅ​ក្នុង​ឃុំ​ផាត់​សណ្ដាយ​ ស្រុក​កំពង់​ស្វាយ​ ខេ​ត្ដកំពង់​ធំ​។ គម្រោង​នេះ​នឹង​អនុ​វត្ដដោយ​ពង្រីក​វិសាលភាព​ត្រី​ទន្លេ​ ដែលជា​ផលិតផល​អភិរក្ស​ជី​វចម្រុះ​ក្នុង​តំបន់​បឹងទន្លេសាប​ដោយ​ចាប់ដៃ​គូស​ហការជាមួយ​អាជីវករ​បោះ​ដុំ​ក្នុង​ឃុំ​ផាត់​សណ្តាយ​ ដើម្បី​ពង្រឹង​ខ្សែ​សង្វាក់​ផលិតកម្ម​ និង​ទី​ផ្សារ​ តាមរយៈ​ការ​ពង្រឹង​ការ​អនុ​វត្ដល្អ​ៗ និង​ការ​កែស​ម្រួល​ដើម្បី​ជៀសវាង​ចំណុច​អវិជ្ជមាន​។ ក្រុម​ផលិត​របស់​ត្រី​ទន្លេ​ទាំង​ ២ ក្រុម​នឹង​ធ្វើការ​សិក្សា​ពី​កិច្ច​សហការ​ និង​លទ្ធភាព​ក្នុង​ការ​ពង្រឹង​ក្រុម​និង​ពង្រីក​វិសាលភាព​ជាមួយ​អាជីវករ​បោះ​ដុំ​ក្នុង​ឃុំ​ផាត់​សណ្ដាយ​ ដោយ​ចងក្រង​ជា​បណ្ដាញ​ខ្សែ​សង្វាក់​ផលិតកម្ម​ចាប់ពី​សហគមន៍​រហូតដល់​ទី​ផ្សារ​ចុងក្រោយ​ជាមួយ​ឈ្មួញ​បោះ​ដុំ​ និង​ផ្សារ​ទំនើប​តូច​ៗនានា​ក្នុង​ក្រុង​ភ្នំពេញ​ និង​តាម​បណ្ដា​ខេ​ត្ដ។ កិច្ច​សហការ​នេះ​នឹង​ជំរុញ​បង្កើត​ជាស​ហគ្រាស​សហគមន៍​ ដោយមាន​ការ​ទទួលស្គាល់​ពី​ក្រុមប្រឹក្សា​ឃុំ​ផាត់​សណ្ដាយ​ និង​នាយក​តំបន់​រ៉ា​មសារ​ ស្ទឹង​សែន​ ដើម្បី​ចូលរួម​គាំទ្រ​ផ្ដល់​ជា​អនុសាសន៍​និង​ការ​សម្របសម្រួល​លើ​ដំណើរការ​ និង​អនុញ្ញាតិក្រុម​ មន្រ្ដី​ឧទ្យានុរក្ស​ក្នុង​ការចូលរួម​ត្រួតពិនិត្យ​វាយ​តម្លៃ​ និង​ការងារ​ល្បាត​ពង្រឹង​អនុ​វត្ដច្បាប់​។